شيء من الخاطر ..




أنا من بدأ الدوام وأنا أساليب الكتابة عندي معدومة .. لذا أرجو أن تتقبلوا أسلوبي هذا بنفس راضية لا هنتم .. آآآآآآه .. فيه كلمتين تقرقع بخاطري من زماااااااااااااااان .. من يوم تعرفت على مصلى كليتنا الموقر .. بداية بأحكي لكم حكاية مبدأ " الدين يسر " .. هذا المبدأ واللي هو جزء من ديننا الحنيف ما أدري وين يوجد في مصلانا وعند مشرفاته .. بأحكي لكم شوية سواليف وأنتم أحكموا وقولولي وين ألقى هالمبدأ .. وحدة تقول بأسأل عن حكم مشاركة طالبة الإنتساب في برنامج لطالبات الإنتظام .. ووحدة تقول بننزل الساحة ننكر على الطالبات اللي حاطين نظارات شمسية على رؤوسهم .. طيب وش السبب وإيش الحجة اللي أقولها لهم قالت لأنها من خوااااااااااارم المروءة !! وماينفع أبدا تكون برامج المصلى فيها ترفيه لأن كل حياة البنات ترفيه ولعب .. لازم يكون الخطاب جدي .. يكفينا لعب وترفيه .. لأن مافيه فايدة .. طيب لو كان الترفيه هذا مخلوط معه فوائد ؟ حتى ولو ماينفع ولا يصح .. هذي بعض سواليف مصلانا مع مبدأ " الدين يسر " وماخفي أعظم .. نروح لحكاية ثانية .. "أنت مبدعة لكن مو من حقك تبدعين في مصلى الكليه الأدبية خاصة إذا ما كنت مقربة من مشرفة المصلى " هذا أحد القوانين الرئيسية والهامة في مصلانا الموقر .. المقربات من المشرفة فقط هم من يمتلكون الحق في إبداء الرأي بل وفرضه أحيانا وعرض الأفكار والإبداعات وتنفيذها براحتهم .. أنت يالضعيفة المسكينه اللي ماتحبك المشرفة إنسي تماما إنه بإمكانك تبدعين .. حتى الدروس .. لا تفكرين أبدا إنه من حقك إلقاء درس أو حتى تجهيزه .. بدون ماتعرضين الموضوع وإلقائك على المشرفة .. وبعدين إنتظري رأيها .. ياتلقين يا إرتاحي مو مسموح لك ..لأن مو أي موضوع يلقى والإلقاء لازم يكووووووون بمستواهم هم .. احتمال يكون أسلوبك حلو وإلقائك أيضا بس مو اللي يبونه هم فلازم تكونين مرفوضة .. وموضوعك بعد ممكن يكون حلو وأنت تاعبة عليه في اختياره وتجميع مادته بس مو من نوعية المواضيع اللي يحبونها فلازم يكون مرفوووض.. على كذا خذيها من قاصرها وارتاحي وبلاش تتعبين نفسك ..لأنك من الأساس غير مرغوب فيك .. الدروس لايلقيها إلا المقربات من المشرفة ..والأفكار والإبداعات لكل شي يختص بناشاطات المصلى للمقربات من المشرفة فقط .. ومن غير ليــــــــــــه .. حكاية ثالثة : التشديد عالبنات وتمييز بعضهم على البعض الآخر .. سبب سااااااااالفة خطييييرة .. صاروا بنات المصلى يكرهون بعض .. ربما هالشيء مو واضح بس موجود .. وحركات العريفة السرية اللي بأيام الإبتدائي صارت موجودة بين كل مجموعة من مجموعات بنات المصلى .. ودورها توصل كل كلام معارض لسياسة المصلى الموقر للمشرفة .. وصارت كل كلمه تقولينها محسوبه عليك ولازم تاخذين عقابك عليها لأن حتى المعارضة ماهي من حقك ..
هذي أبرز سواليف وحكايات مصلانا الموقر .. نفسيييييي ألقى حل لهالسوالف .. عندكم ؟ تكفون لا تبخلون فيه ..

تعليقات

  1. أبجديات العمل الجماعي ..وخاصة الخيري
    غائبة بشكل ملحوظ في مصلى الكلية ..

    لكن ذلك لن يثنينا بإذن الله عن الوصول يا غالية


    وأشكر لكِ غيرتك..وإن دل على شيء فعلى روحك الراقية
    وتطوعك الملحوظ في المجالات الدعوية


    أمر آخر

    أنا استمتع بقراءة (سواليفك ) وإن احتوت أخطاء كتابية

    واسأل الله لكِ مزيد من التفوق حبيبتي ..سما

    ردحذف
  2. أعترف لك بأني انسحبت تماما من كل شي يمت للمصلى بصلة ..
    بس صرت أروح له عشان ألتقي بمجموعة من البنات فيه فقط لا غير ..وهذا مو بس حالي .. بل حال الكثيرات .. أتمنى ألقى حل للوضع السيء في المصلى ..
    أتمنــــــــــــــــى ..
    شكرا لتفاعلك وتواجدك ياعزيزتي ..

    ردحذف

إرسال تعليق

المشاركات الشائعة من هذه المدونة

ألا وإن في الجسد مضغة ..

ولي وحدي تباريحي وحزني ،،

غياب لايغتفر !!